Shenjat e dashurisë

Vështrova murin si një pelegrin i ngashëryer
me një trëndafil të kuq në dorë

atë mur ku qemë ngjeshur skuqur flakë
kur më pate përthekuar

dhe rrëmbyer

si fjala e bukur frymën

aty shfletova gjurmët
dhe pash afshin e dashurisë

që ngrihej përpjetë

fjolla-fjolla

ndërmjet gjetheve të thara

edhe ofshamat e lashta

verdhalashe e të murrme

të vakëta

amësimi ende aty

edhe mbresat e gishtërinjëve

kurse grimcat e dashurisë
hedhin hijen nëpër dekada

siç përplasën të tyren nëpër shekuj

Tristani dhe Izolda

në mur zemra jonë

me një shtizë ngulur mu në mes
dy iniciale të ndara
gati të shlyera

dhe tutje një datë

shënova ditën e vizitës

inicialet trash

dhe ika

ika

plot njomësi e vegime