Ti dhe uji

kur ti lan trupin tand

dhe mbi ty derdhet uji ngrohtë

për m'i vezullue flokët tua

dhe vazhdon si çurgim

mbi gjinjtë tu

për me rrëshqit me pika t'trasha 

si përkëdhelje

dhe rrëmbyeshëm ndërmjet kofshëve

si ngashërim

ose curril ndërmjet mollaqeve

si ngashënjim

për m’i puth thembrat tua për herë të fundit

dhe për me braktisë vaskën

si lotnajë

sa kisha dashtë me qenë ajo reshje

por me t’u lëshue puhishëm mbi flokë

pastaj me u kapë si ujëvarë në buzët tua

e me t'u mbështjell si ledhatim përreth qafës

i afshum me kërcye në maje t’cicave

dhe pastaj rrëmbyeshëm teposhtë

e m'u ndal si tërbim në prehrin tand

dhe aty m'u mendue gjatë

m'u hallakat

e me fol vet me veti

dhe me t'vërshue me breshni epshi

e me kujtue atë rrugëtim si rrebesh

e me rideshirue m'u ba furtunë

e me vazhdue ngadalë me t’përvlue

e me ta rrëqeth krejt trupin

e me t’dhurue plot ofshama

e me mendue për ty

dhe me kujtue fundin si lot

(kur ti del jashtë n'maje të gishtave

dhe len pasqyrën e avullueme pas vete

dhe shtrihesh me buzëqeshje n'shtrat

marr turr

për m'u hedh mbi trupin tand me butësi

për m'i lexue andrrat tua ngeshëm

dhe për me ripërtëri jetën me ty)

e kur ti vishesh

due me vdek n'gjoksin tand

si stërpikë parfumi

Nga përmbledhja "Hijedritat e jetës, poezi 2010-2017", botim i dytë:

• Te lulu Hijedritat e jetës
  Tek amazon Hijedritat e jetës